बबरमहलको बाग्मती करिडोर छेउमा एक वर्षअघिदेखि सञ्चालनमा आएको छ, रेल स्टेशन ।
रेल स्टेशनको अगाडि बाग्मती नदी छ, नदी पारी ठूलै क्षेत्रफल ओगटेको यूएनपार्क छ । पार्कबाट रेल स्टेशन देखेर मान्छे मात्रै वारपार गर्न मिल्ने फलामे पुलबाट रेल स्टेशन आइपुग्छन् भने कोही सामाजिक सञ्जालमा देखेर यहाँसम्म आइपुग्छन् ।
काठमाडौंमा ‘मेट्रो रेल’ सञ्चालन गर्ने भनी तत्कालिन प्रधानमन्त्री केपी शर्मा ओली नेतृत्वको सरकारले रेल विभागको कार्यालय स्थापना गरे पनि काम नभइरहेकाबेला अर्घाखाँचीका तीन युवा मिलेर रेल स्टेशन बनाएका हुन् ।
तर अर्घाखाँचीका तीन युवाहरु सुदन बन्जाडे, जनक क्षत्री र दीपक पौडेलले यात्रु बोकेर गुड्ने रेल नभई विभिन्न परिकारका खानाहरु खान भनी ग्राहकका लागि बनाएको रेष्टुरेन्ट मात्र हो ।
झण्डै दुई वर्ष कोभिड संक्रमणका कारण ब्यवसायहरु अस्तब्यस्त भइरहँदा तीन युवाले रेलकै आभाष दिलाउने गरी डिब्बाहरु बनाएर रेष्टुरेन्ट सञ्चालनमा ल्याएका हुन् ।
विद्यालय पढ्दाखेरिका दौंतरी युवाहरु मिलेर खोलेको रेष्टुरेन्टमा रेलका तीन वटा डिब्बा रहेका छन् । तिनै रेलको डिब्बाभित्र बसेर खान मिल्ने टेबल सजाइएका छन् । जसमा ग्राहकले रेलमा बसेर खाएको अनुभूति गर्छ ।
ग्राहकलाई आकर्षित गर्न ब्यवसायीहरुले विभिन्न शैलीहरु अपनाइरहँदा युवाहरुले रेल सम्झाउने गरी रेष्टुरेन्ट सञ्चालन गरेका हुन् । गत वर्ष साउनदेखि सञ्चालनमा ल्याएको यो रेष्टुरेन्टमा रेल बनाउन मात्रै पाँच लाख रुपैयाँभन्दा बढी खर्च लागेको सुदनले बताए ।
झण्डै एक करोड लगानीमा गत वर्षको लकडाउन खुलेपछि सञ्चालनमा ल्याइएको रेल स्टेशनमा थरीथरीका ग्राहकहरु आउने गरेका छन् ।
कसरी बन्यो ‘रेल स्टेशन’को अवधारणा ?
लकडाउनको समयमा सुदन र उनका साथी साथी कामको शिलशिलामा थिए । अर्को एकजना साथी विदेशबाट आए ।
‘हामीमा आफ्नै नयाँ फरक तरिकाको विचार भएका कारण र तीनै जनालाई रेस्टुरेष्टमा रुची भएकाले रेल स्टेशनको अवधारणा ल्यायौं ।’– बोल्ने समयसमेत नपाएका सुदनले सुनाए । अब नेपालमै बसेर केहि गर्न पर्छ भन्ने सोंचका साथ नयाँ तरिकाको व्यवसाय रेल स्टेशन सुरु भएको सञ्चालक मध्येका एक दीपकले बताए ।
रेस्टुरेन्ट बनाउनमा सम्पूर्ण आइडिया, डिजाइन र मेहेनत तीनै जना युवाको छ । अर्घाखाँचीको सन्धीखर्क एउटै गाउँमा हुर्किएका भए पनि आ–आफ्नो जीवनमा व्यस्त भएका कारण उनीहरु एकअर्काबीच झन्डै ७ वर्षपछि भेट भयो । सात वर्षपघिको युवा चिन्तनले नयाँ परिकल्पनामा ‘रेल स्टेशन’ बन्यो ।
‘हाम्रा देशका नेताले रेल चढाउने एउटा आशा मात्र देखाए तर हामी वास्तविक रेल नभए पनि केहि समयको लागि रेल जनतालाई चढाउने विचारले काम सुरु गर्यौ ।’– उनीहरुले हाँस्दै सुनाए ।
नयाँ कन्सेप्टमा गरिएको यो ब्यवसायप्रति ग्राहक पनि आकर्षित हुने गरेकाले उनीहरु खुशी देखिन्छन् ।
के के बन्छन् परिकार ?
रेल स्टेशनमा अन्य रेस्टुरेन्टमा पाइने सामान्यतः सबै परिकारका खानेकुरा तयार हुन्छन् । भारतको विभिन्न सहरमा रहेको साँच्चिकैको रेल स्टेशनमा अवस्थित रेष्टुरेन्टहरुमा पाइने परिकारहरु यो रेष्टुरेन्टमा पनि पाइन्छ ।
सामान्य पाइने परिकारसहित धेरै जसो रेलमा खाइने पकौडा, बिर्यानी, समोसा, कटिङ चिया लगायतका परिकार यो रेल स्टेशनमा बन्छ । यो रेस्टुरेन्ट अरु भन्दा फरक भएका कारण हेर्नकै लागि पनि ग्राहकहरु दिनप्रतिदिन बढ्दै गएका छन् ।
‘खानाहरु पनि स्वादिष्ट भएका कारण ग्राहकहरु फर्कीफर्की आउने गर्छन् । हामीलाई ग्राहकबाट एकदमै राम्रो प्रतिक्रिया आएको छ । हामी ग्राहकको प्रतिक्रियाबाट उत्साहित छौं ।’– सुदनले भने ।
‘मैले जागिर छोडेर यस नयाँ काम गर्ने सोच बनाए’, सुदनले भने’– ‘हामी यस क्षेत्रलाई अझ व्यवस्थित तरिकाले सञ्चालन गरि ग्राहकको मन जित्ने छौं ।’
