काठमाडौं। तीन वटा जीवन बीमा कम्पनीहरुले एकै पटक मर्जरको लागि सम्झौता गरेका छन् । यूनियन लाइफ ईन्स्योरेन्स कम्पनी लिमिटेड, गुरांस लाइफ ईन्स्योरेन्स कम्पनी लिमिटेड र प्राइम लाइफ ईन्स्योरेन्स कम्पनी लिमिटेड बिच एक आपसमा गाभिने सहमती भएको छ । सो सम्बन्धमा तीनै कम्पनीका अध्यक्षहरुले सहमतीपत्रमा हस्ताक्षर गरेका हुन् ।
यी कम्पनीको उदेश्य पुँजीगत आधारलाई मजबुत र सुदृढ गरी प्रतिस्पर्धात्मक क्षमताको विकास गर्दै बीमित, लगानीकर्ता लगायत सरोकारवालाहरुको दीर्घकालीन हित संरक्षण गर्नु जनाईएको छ ।
त्यस्तै, तीनै कम्पनीको वित्तीय, मानव संशाधन, प्राविधिक एवं अन्य क्षमता अभिवृद्धि गर्दै सेवाग्राहीलाई आधुनिक प्रविधिजन्य बीमा सेवा सुविधा प्रदान गरिने भएको छ ।
मुलुकमा जीवन बीमालाई सुशासित, सुरक्षित, स्वस्थ्य, कुशल तथा सक्षम एवं प्रभावकारी बनाउन सहयोगी भुमिका निर्वाह गर्ने र मुलुकको समग्र जीवन बीमा प्रणालीको सम्बद्र्धन गरी सो प्रति सर्वसाधारणको विश्वसनीयता अभिवृद्धि गर्दै बिमितको हित संरक्षण गर्ने उदेश्य तीनै कम्पनीले लिएका छन् । सोही उदेश्य अनुरुप बिग मर्जरको लागि सम्झौता गरिएको ति कम्पनीहरुले जानकारी दिएका छन् ।
