काठमाडौँ। नेपाल राष्ट्र बैंकले नेपाल बंगलादेश बैक (एनबी) लाई गाभेर एकीकृत कारोवार गर्नको लागि नबिल बैंकलाई सैद्धान्तिक सहमती दिएको छ । राष्ट्र बैंकको पछिल्लो पटक बसेको सञ्चालक समितीको बैठकले नबिललाई यस्तो सहमती दिएको राष्ट्र बैंकले जानकारी दिएको छ ।
सैद्धान्तिक सहमती पाएसंगै अबको छ महिना भित्रमा नबिलले एनबीलाई गाभेर एकीकृतरुपमा कारोवार सञ्चालन गर्नुपर्ने छ । राष्ट्र बैंकका अनुसार गत पुस २९ गते नबिलले एनबी बैंकलाई प्राप्ती गर्नको लागि सम्झौता पत्रमा हस्ताक्षर गरेको थियो । प्राप्तीको लागि एनबीको एक सय कित्ता शेयर बराबर नबिलको ४३ कित्ता शेयर हुने गरी स्वाप रेसियो कायम गर्ने सहमती भएको थियो । उक्त समय भएको सम्झौतामा नबिलका तर्फबाट सञ्चालक उदयकृष्ण उपाध्याय र नेपाल बंगलादेश बैंकका तर्फबाट इन्द्रबहादुर थापाले हस्ताक्षर गरेको राष्ट्र बैंकको भनाई छ ।
